Дундговь аймаг байгуулагдсаны түүхт 80 жилийн ой, “Хүний хөгжлийг дэмжих жил”-ийн ажлын хүрээнд спортыг орон нутагт олон төрлөөр нь хөгжүүлэх, тамирчид, багш дасгалжуулагчдыг чадавхжуулах, спорт сонирхогч, спортоор хичээллэгчдийн тоог нэмэгдүүлэх, спорт холбоодын үйл ажиллагааг дэмжиж, төрийн болон төрийн бус байгууллагуудын хамтын ажиллагааг өргөжүүлэн ажилласнаар 2022 онд Дундговь аймгийн баг тамирчид Улсын аварга шалгаруулах уралдаан, тэмцээнүүдээс алтан медаль-40, мөнгөн медаль-54, хүрэл медаль-48 нийт 142 медалийг хүртэж, Буриад сурын улсын мэргэн-1, Шагайн харвааны улсын мэргэн-1, Олон Улсын хэмжээний мастер-2, спортын мастер18, спортын дэд мастер 42, улсын шүүгч-4-өөр нэмэгдэж, 2 уран бүтээлч мэргэжлийн улсын уралдаанд амжилт үзүүлснийг аймгийн Засаг дарга Ц.Мөнхбат хэлсэн үгэндээ цохон тэмдэглээд хөдөлмөр бүтээлийн шинэ амжилтуудаар шинэ оноо угтаж байгаа амжилтын эздэд талархан, баяр хүргэв.
Аймгийн Засаг даргын 2022 оны А/88 дугаар захирамжийн 2 дугаар хавсралтаар батлагдсан “Урамшууллын жишиг тогтоох журам”-ын дагуу энэ оны сүүлийн хагас жилд зохион байгуулагдсан Улсын аварга шалгаруулах урлаг, спортын тэмцээн, уралдаанд амжилттай оролцсон уран бүтээлчид, баг тамирчид, багш дасгалжуулагч нийт 101 хүнд аймгийн Засаг даргын 2022 оны 12 дугаар сарын 22-ны өдрийн А/536 дугаар захирамжаар 16.180.000 төгрөгийн урамшуулал олголоо.
Энэ онд соёл, урлагийн чиглэлээр 362,6 сая, биеийн тамир, спортын чиглэлээр 147,2 сая төгрөгийг аймгийн орон нутгийн хөгжлийн сан, аймгийн Засаг даргын нөөц хөрөнгөөс гарган зарцуулсан бөгөөд 2023 онд Нийтийн биеийн тамирыг хөгжүүлэх төсөл, арга хэмжээний зардалд 95 сая төгрөгийг орон нутгийн хөрөнгө оруулалтаас зарцуулахаар батлагдаад байгааг мэдэгдэж, цаашдынх нь ажил хөдөлмөр, урлаг, спортын уралдаан наадамд улам их амжилт гаргахыг хүсэн ерөөв.
