Боловсрол, соёл урлагийн газар. Америкийн Нэгдсэн Улсын ахлах сургуульд 1 жилийн хугацаатай суралцах тэтгэлэгт FLEX хөтөлбөрт Сайнцагаан сумын Цэгц билиг сургуулийн сурагч Б.Билгүүн, Эрдмийн далай цогцолбор сургуулийн сурагч С.Балжинням нар тэнцлээ. Энэхүү хөтөлбөрт 21 аймаг, 9 дүүргээс хүүхдүүд өрсөлдөж 3 шаттайгаар шалгаруулалтад оролцон тэнцсэн 24-30 хүүхэд АНУ-д 100% тэтгэлэгтэй суралцах боломжтой болдог юм.
Өнгөрсөн жилийн шалгаруулалтад манай аймгаас Цэгц билиг сургуулийн сурагч Г.Баттогтох, Э.Буянхишиг нар тэнцэн АНУ-ын ахлах сургуульд амжилттай суралцаж байна. Э.Буянхишиг, Б.Билгүүн нар нь АНУ-ын тэтгэлэгт Аксесс хөтөлбөрт мөн хамрагддаг байна.
Мөн Аксесс хөтөлбөрийн хүүхдүүдээс Цэгц билиг сургуулийн сурагч Ч.Маргад, Б.Билгүүн, Мандал сургуулийн сурагч Г.Маралмаа, Говийн ирээдүй цогцолбор сургуулийн сурагч Б.Өлзийхишиг нарын 4 сурагч Sport visitor program зуны тэтгэлэгт хөтөлбөрийн эхний шалгаруулалтад тэнцэн дараагийн шатны ярилцлагад орохоор бэлтгэж байна. Энэхүү зуны хөтөлбөр нь 2020 оны 8 сарын 1-15-ны хооронд АНУ-д спортын сургалт, арга хэмжээнд хамрагдах аж.
FLEX хөтөлбөрийн дараа жилийн шалгаруулалт 2020 оны 8 сард зарлагдах бөгөөд энэ талаарх мэдээллийг авахыг хүсвэл Аксесс хөтөлбөрийн хүүхдүүдтэй холбогдож мэдээлэл авах боломжтой.
