Байгаль орчин, аялал жуулчлалын газар. “Ойн тухай хуулийн” 31 дүгээр зүйлийн 31.1 дэх заалтын дагуу 16 насанд хүрсэн иргэн бүр нэг, аж ахуйн нэгж, байгууллага таваас доошгүй мод тарьж ургуулах, услах, арчлах бөгөөд өөрийн хүчээр гүйцэтгэх боломжгүй тохиолдолд зардлыг хандивлана гэж заасан байдаг. Мөн Монгол Улсын Ерөнхийлөгчийн 2010 оны 63 дугаар зарлигаар жил бүрийн 5, 10 дугаар сарын 2 дах 7 хоногийн Бямба гарагийг "Бүх нийтээр мод тарих өдөр" болгон зарласан.
2020 оны хувьд "БҮХ НИЙТЭЭР МОД ТАРИХ ҮНДЭСНИЙ ӨДӨР" 05 дугаар сарын 09-ний өдөр тохиож байна.
Дундговь аймгийн хувьд 2010-2019 оны хооронд 19 удаагийн Бүх нийтээр мод тарих өдрийг зохион байгуулсан бөгөөд тус арга хэмжээг Сайнцагаан, Луус, Гурвансайхан, Дэлгэрцогт, Цагаандэлгэр сумдад зохион байгуулав. 2010-2019 онуудад аймгийн хэмжээнд “Бүх нийтээр мод тарих өдөр” арга хэмжээнд 1060 аж ахуйн нэгж байгууллагын 25263 иргэн 120.02 сая төгрөгийн хөрөнгөөр нийт 149398 ширхэг мод тарьсан байна.
Мод тарьснаар ногоон байгууламж нэмэгдэхээс гадна уур амьсгалын өөрчлөлтөд эерэг нөлөө үзүүлэх, хөрсний бохирдол, хүнд металлуудыг задлах зэрэг маш их эерэг ач холбогдолтой. Тэр тусмаа нэг га ой мод 18 сая шоо метр агаарыг цэвэршүүлж, утаа униарын 30-35 хувийг өөртөө шингээн, дуу чимээний 25 хувийг замхруулж, тоос шороог 76 хувь хүртэл өөртөө барьдаг чанар нь хүн амын төвлөрөл ихтэй нийслэл хотын орчны бохирдлыг бууруулахад онцгой ач холбогдолтой юм.
