Дундговь аймгийн Боловсрол, шинжлэх ухааны газар болон сумдын цэцэрлэг, сургуулиуд хамтын ажиллагааныхаа хүрээнд хоол үйлдвэрлэлд ажиллаж байгаа хүний нөөцийг чадавхжуулах, мэргэжлийн түвшнийг ахиулах, тогтвор суурьшилтай ажиллах нөхцөл боломжоор хангах зорилгоор Политехник коллежтой хамтран гурвалсан гэрээ байгуулан “Хоол үйлдвэрлэл” -ийн хосмог сургалтын нэг жилийн ангид ажилчдыг элсүүлэн суралцууллаа. Дундговь аймгийн Политехник коллежийн “Хоол үйлдвэрлэл” -ийн хосмог сургалтын нэг жилийн ангид 2023-2024 оны хичээлийн жилд нийт 27 оюутан суралцаж байгаагаас 15 оюутан нь Адаацаг, Говь-Угтаал, Дэлгэрцогт, Дэлгэрхангай, Дэрэн, Өлзийт, Өндөршил, Эрдэнэдалай, Сайнцагаан, Цагаандэлгэр сумдын цэцэрлэг, сургуулийн тогооч нар байна.

“Хоол үйлдвэрлэл” -ийн мэргэжлийн боловсролын нэг жилийн төгсөлтийн шалгалт нь хоёр үе шаттайгаар зохион байгуулагдаж байгаа бөгөөд 2024 оны 05 сарын 30-ны өдөр онолын шалгалтыг онлайнаар гүйцэтгэсэн бол өнөөдөр буюу 2024 оны 05 дугаар сарын 31-ний өдөр ур чадварын шалгалтыг амжилттай зохион байгууллаа. Уг шалгалтын үнэлгээний ажлын хэсэгт Боловсрол, шинжлэх ухааны газрын сургалтын орчин, хоол хүнс хариуцсан мэргэжилтэн Б.Уранчимэг, Политехник коллежийн багш, үнэлгээний ажилтан А.Эрдэнэтуяа, ажил олгогчийн төлөөлөл, үнэлгээний ажилтан С.Цэцэгмаа нар ажиллалаа. Хамтран ажилласан Дундговь аймгийн Политехник коллеж, сумдын цэцэрлэг, сургуулиудын удирдлага, хамт олонд талархал илэрхийлье.