Алхалт бол хүний бие махбодын үндсэн хөдөлгөөн. Алхахад биднээс ямар нэг төхөөрөмж, байр талбай шаардлагагүй маш энгийн хялбар бөгөөд, хүний эрүүл мэндэд эрсдэлгүй, ач холбогдол ихтэй, жилийн аль ч улиралд хийх боломжтой юм. Алхалтыг тайван удаанаар эхлэн дунд зэргийн эрчимтэй алхах хүртэл өөрөө тохируулж, амьсгалын болон зүрхний тоог нэмэгдүүлэн идэвхтэй хөдөлгөөн болгодог.

Алхалтын ач холбогдол их юм. Үүнд:

• Сэтгэл санаа тайвширч, стресс бухимдалаас сэргийлнэ.
• Зүрхний үйл ажиллагааг сайжруулна.
• Цусан дахь сахарын хэмжээг тэнцвэржүүлнэ.
• Цусны даралт ихсэхээс урьдчилан сэргийлнэ.
• Биеийн жинг хэвийн хэмжээнд барина.
• Үе мөчний хөдөлгөөн сайжирна.

Ингээд та бүхнийг Дэлхийн алхалтын өдөртэй нэгдэж өөрийнхөө эрүүл мэндэд цаг гарган Дэлхийн эрүүл мэндийн байгууллагын зөвлөмж болох “Өдөрт 30-аас дээш минут идэвхтэй дасгал хөдөлгөөнөөр хичээллэж, 10000 алхалт” –ыг амьдралдаа хэвшүүлэхийг  уриалж байна.