Энэ сарын 12, 13-ны өдрүүдэд “Жендерийн дүн шинжилгээ хийх нь” сэдэвт Жендерийн тэгш байдлыг хангах мэргэжилтэн, манлайлагчдын хоёрдугаар чуулга уулзалт Мандалговь хотноо боллоо.
Чуулга уулзалтад Засгийн газрын Хэрэг эрхлэх газар, Төрийн албаны зөвлөл, Сангийн яам, Уул уурхай, хүнд үйлдвэрийн яам, Байгаль орчин, аялал жуулчлалын яам, Үндэсний хөгжлийн газар, Ашигт малтмал газрын тосны газар, Цэнгэг усны нөөц, байгаль хамгаалах төв, Газарзүй-Геоэкологийн хүрээлэн, Удирдлагын академи болон Дорнод, Дундговь, Сүхбаатар, Төв аймгийн төлөөлөгчид болон Институцийн өөрчлөлт хийх замаар эрдэс баялгийн менежментийг сайжруулах нь төслийн багийнхан оролцсон юм. Энэ үеэр Канадын MERIT төсөл хэрэгжиж буй агентлаг болон аймгууд 2019 онд хийж бүтээсэн ажлын тайланг танилцуулж, туршлага солилцон, алсын хараагаа тодорхойлжээ.
Чуулга уулзалтаар Жендерийн клубийн 2020 оны орон нутгийн зохицуулагчаар Дундговь аймгийн Засаг даргын Тамгын газрын Нийгмийн бодлогын хэлтсийн дарга А.Нарантуяа сонгогдлоо. Түүнчлэн чуулга уулзалтын төгсгөлд оролцогчдод гэрчилгээ гардуулсан байна.
