Энэ сарын 13, 14-ний өдрүүдэд сумдын COVID-19 вирусийн авч хэрэгжүүлж байгаа ажлын явцтай газар дээр нь танилцаж, заавар зөвлөгөө өгөн, мэргэжлийн удирдлагаар хангах, бэлтгэл бэлэн байдлыг хангуулах зорилгоор ажлын хэсгүүд сумдад ажиллаж, ажлын тайланг өнөөдөр аймгийн Засаг дарга, Онцгой комиссын дарга О.Бат-Эрдэнэд танилцууллаа.
Тус ажлын хүрээнд сумдад гарч буй хяналтын постыг шалгаж, сумдын Онцгой комиссын бүрэлдэхүүнийг шуурхай штабт, мэргэжлийн ангийн бүрэлдэхүүнийг хяналтын постод 24 цагаар тасралтгүй ажиллуулах талаар чиглэл, зөвлөмж өгчээ. Мөн тусгаарлах эмнэлэг, ажиглах байрны тусгаарлан сэргийлэлт, эмнэлгийн тусламж, хамгаалах хувцас, хэрэгсэл, ариутгал халдваргүйтгэлийн бодисын бэлэн байдал, эмч, эмнэлгийн хэрэгслийн боломж, нөөцтэй танилцан, зөвлөгөө, зөвлөмжөөр хангасан байна.
Сумдад аймгийн Засаг даргын орлогч Ж.Мөнхчулуун, Санхүү, төрийн сангийн хэлтсийн дарга А.Ганбат, Нийгмийн бодлогын хэлтсийн дарга А.Нарантуяа, Хөрөнгө оруулалт, хөгжлийн бодлого төлөвлөлтийн хэлтсийн дарга Н.Эрдэнэ-Очир, Эрүүл мэндийн газрын эмнэлгийн тусламжийн хэлтсийн дарга Л.Ганбат нараар ахлуулсан ажлын хэсэг ажиллаж, удирдамжийн хүрээнд ажиллажээ.
