Монгол Улсын Батлан хамгаалахын сайдын тавдугаар сарын 11-ний өдрийн тушаалаар Дундговь аймгийн Сайхан-Овоо сумын өндөр настан Сүрэнхорын Цэгмидийг Байлдаанд оролцсон ахмад дайчдад үнэмлэх, тэтгэмж олгох журмын дагуу ахмад дайчнаар бүртгэн авч, Байлдаанд оролцогчийн үнэмлэх, 1,000,000 төгрөгийн хамт гардууллаа. Хүндэт цол тэмдгийг энэ сарын 13-нд Батлан хамгаалах яамны Газрын дарга, хурандаа Ө.Эрдэнэ-Очир, Дайнд оролцогчдын холбооны тэргүүн, хурандаа Г.Лүндэн, Дундговь аймгийн Цэргийн штабын дарга, дэд хурандаа Ш.Гансүх нар нутагт нь очиж, гардуулан өгсөн байна.
Тэрээр 1942 онд Монголын ард түмнийг төлөөлөн Зөвлөлтийн улаан армид “Хувьсгалт Монгол” танкийн цувааг фронтод хүргэх төлөөлөгчдийн бүрэлдэхүүнд багтан Монголын ард түмний бэлгийг гардуулж явсныг нь өндрөөр үнэлэн ийнхүү шийдвэрлэжээ.
