Дундговь аймгийн Хөдөлмөрийн аюулгүй байдал, эрүүл ахуйн салбар зөвлөлөөс үйлдвэрлэлийн орчин, ажлын байрны хөдөлмөрийн нөхцөлийг сайжруулж, ажилтныг үйлдвэрлэлийн осол, мэргэжлээс шалтгаалсан өвчин бусад эрсдэлээс хамгаалах зорилгоор “Эрүүл аюулгүй ажлын байрыг эрхэмлэгч аж ахуйн нэгж байгууллага”–ыг шалгарууллаа.
“Эрүүл аюулгүй ажлын байрыг эрхэмлэгч аж ахуйн нэгж байгууллага” шалгаруулах журмын дагуу сонгон шалгаруулалтын дүнгээр Дундговь аймгийн Мэргэжлийн хяналтын газар Тэргүүн байр, Эрдэнэдалай сумын Хүүхдийн цэцэрлэг Хоёрдугаар байр, Мэргэжлийн сургалт үйлдвэрлэлийн төв Гуравдугаар байрыг тус тус эзэлж, өргөмжлөл, мөнгөн шагналаар шагнуулжээ. Мөн уралдаанд оролцсон байгууллагуудад батламж гардуулж, зөвлөмж хүргүүлэв.
Түүнчлэн улсын уралдаанд Дундговь аймгийн Баянжаргалан сумын нутаг дэвсгэрт уул уурхайн чиглэлээр үйл ажиллагаа явуулж буй “Говьшоо” ХХК нь “Эрүүл аюулгүй ажлын байрыг эрхэмлэгч шилдэг байгууллага-2019”-аар шалгарсан байна. Ингэснээр улсын хэмжээнд Дундговь аймгаас 3 дахь удаагаа Эрүүл аюулгүй ажлын байрыг эрхэмлэгч шилдэг байгууллага шалгарч, Хөдөлмөрийн аюулгүй байдал, эрүүл ахуйн салбар зөвлөл ажлын үр дүн, амжилтаа дахин баталжээ.
