Дундговь аймгийн Засаг дарга Ц.Мөнхбат, Засаг даргын орлогч М.Анхбаяр нар өнөөдөр аймгийн Шүүхийн үйл ажиллагаатай танилцаж, тулгамдаж буй асуудлуудын талаар санал бодлоо солицлоо.
Тус байгууллагаас шүүхийн ерөнхий системийг ашиглан иргэд өөрсдийн хэрэг, маргааны үйл явцыг хянах, хувийн нэвтрэх кодны тусламжтайгаар мэдээллийг цахимаар авах боломжийг бүрдүүлжээ. Мөн өөрсдийн цахим хуудсанд “Иргэн танд” цогц буланг ажиллуулж иргэдэд нээлттэй, түргэн шуурхай үйлчилгээг үзүүлэхээр зорьж буйг онцолсон юм.
Шүүхийн удирдлагуудын зүгээс барилгын асуудал хүндрэлтэй байгаа бөгөөд албан хаагчдын тав тухтай орчинд ажиллах боломж, нөхцөл хангагдахгүй байгаа асуудлыг хөндсөн байна. Уулзалтын үеэр аймгийн Засаг дарга Ц.Мөнхбат энэ асуудлаар хамгийн боломжит хувилбарыг судлан үзэж, орон нутгийн зүгээс дэмжин, хамтран ажиллахаа илэрхийлэв.
