Дундговь нутгаас төрөн гарсан Улаанбаатар хотод ажиллаж амьдарч байгаа бөхчүүдийн төлөөлөл болох улсын начин Э.Даш, аймгийн хурц арслан Д.Дэлгэрбат нарын бөхчүүдийн төлөөлөл аймгийн Засаг даргатай уулзалт хийж санал солилцлоо.
Дундговь нутгийн нийт бөхчүүд нэгдэн нийлж, нэгдсэн зохион байгуулалттай хамтарсан бэлтгэл сургуулилт хийх, улсын баяр наадам болон аймаг байгуулагдсаны 80 жилийн ойн баяр наадамд амжилттай оролцоход бэлтгэл сургуулилт хийх заал танхим, мэргэжлийн ур чадвартай багш дасгалжуулагч нэн шаардлагатай байгаа талаар дэмжлэг хүсч аймгийн Засаг даргад хандсан юм.
Аймгийн Засаг дарга Ц.Мөнхбат нутаг орноос төрөн гарсан бөхчүүдийн амжилтыг ахиулах, залгамж халааг бэлдэх, цаашлаад бөхийн спорт сонирхогч залуусын амжилт гаргах боломж нөхцөлийг бүрдүүлэхэд анхааран Улаанбаатар хотод бэлтгэл сургуулилт хийх заал, мэргэжлийн багш дасгалжуулагчтай хамтарч ажиллахад дэмжин ажиллахаа илэрхийллээ.
