Өнөөдөр аймгийн Засаг даргын Тамгын газар, Гэр бүл, хүүхэд, залуучуудын хөгжлийн газар, Боловсрол, соёл урлагийн газар, Цагдаагийн газар хамтран “Өсвөр үеийн цахим хэрэглээ – Цахим орчны эрсдэл” сургалтыг зохион байгуулж, аймгийн хэмжээнд байгууллага, аж ахуйн дэргэдэх 98 эцэг эхийн зөвлөлийг хамрууллаа.

Өдрөөс өдөрт цахимжиж буй өнөө үед хүүхдүүд өөрийгөө илэрхийлэх, хөгжүүлэх, хичээл сургалтын үйл ажиллагаагаа цахимаар авах зэрэг олон хэлбэрээр цахим орчинд оршин тогтнож байна. Гэвч насандаа тохироогүй контент, бичлэг, мэдээлэл, зураг зэргийг олж үзэх, садар самуун, хүчирхийллийн шинжтэй зүйлсийг бусдаас хүлээж авах, хүчирхийлэл, бусад гэмт хэргийн хохирогч болох, цахим дайралтад өртөх, сэтгэл санаагаар унах зэрэг сөрөг нөлөөллүүдэд өртсөөр байгаа юм.

Иймд тус сургалтын гол зорилго нь өсвөр насныханд зүй зохистой цахим хэрглээ болон тулгарч болох эрсдэлийн талаарх мэдээллийг хүргэж, түүнчлэн байгууллагуудын гэр бүлийн зөвлөлөөр дамжуулан эцэг эхчүүдэд хүүхдийн цахим хэрэглээнд тавих хяналтыг сайжруулахад чиглэжээ.