НҮБ-ын Хөдөө аж ахуйн байгууллагын санхүүжилтээр Дундговь аймгийн Луус сумын Суварга багийн нутагт нарны эрчим хүчээр ашигладаг өрмийн худаг гаргах, бэлчээрийн олон наст ургамал тариалах төсөл хэрэгжсэн.
Тус төслийн үйл явцтай НҮБ-ын ХААБ-ын Монгол дахь суурин төлөөлөгч Винод Ахужа болон төслийн зөвлөх Жигжидпүрэв, ургамал хамгааллын эрдэм шинжилгээний хүрээлэнгийн судлаачид, Малчин ТВ сурвалжлах баг мөн аймгийн Хөдөө аж ахуйн газрын дарга, Луус сумын Засаг дарга нар газар дээр нь очиж танилцан төслийн үр дүн, цаашид авч хэрэгжүүлэх арга хэмжээний талаар малчдын саналыг сонсон санал солилцлоо.
Төслийн хүрээнд Суварга багийн нутагт нарны эрчим хүчээр ашигладаг өрмийн худаг гаргаж, 2 га талбайд бэлчээрийн ургамал тариалахаар хашаажуулснаас гадна мал аж ахуй эрдэм шинжилгээний хүрээлэнгийн ургамал судлалын доктор, профессорууд бэлчээрийн олон наст ургамал тариалах талаар давтан сургалтуудыг малчдын бүлэгт зохион байгуулсан байна.
