Японы олон улсын хамтын ажиллагааны байгууллага /ЖАЙКА/-аас 2021-2025 онд Дундговь аймагт “Ерөнхий боловсролын сургуулийн үдийн хоолны үйлдвэрлэлийг дэмжих төсөл”-ийг хэрэгжүүлэхээр боллоо. Тус ажлын хүрээнд өнөөдөр аймгийн Засаг дарга Ц.Мөнхбат төслийн ажилтнуудтай уулзалт хийсэн байна.
Энэхүү төсөл нь 2 үе шаттайгаар хэрэгжих бөгөөд эхний үе шатанд /2021-2022 оны хооронд/ үдийн хоолны хөтөлбөрийн өнөөгийн байдалд судалгаа, дүн шинжилгээ хийж, сургуулийн хоол зүйчдийг бэлтгэх, сурагчдын үдийн хоолны шим тэжээлийн стандартыг сайжруулан, хоолны цэсийг баяжуулах төлөвлөгөөг боловсруулах юм. Төслийн 2 дахь үе шат нь 2023 оноос хэрэгжиж эхлэх бөгөөд судалгааны үр дүнд суурилан сурагчдын онцлогт тохирсон шим тэжээлтэй хоол хүнсийг нийлүүлж эхлэх аж.
Аймгийн Засаг даргын зүгээс ЖАЙКА төслийн хамт олонд хамтран ажиллах саналыг хүлээн авч Дундговь аймагт төслийг хэрэгжүүлэх болсонд талархаад, цаашдаа сурагчдын үдийн хоолны чанарыг сайжруулах, орон нутгийн онцлогт тохирсон хоол тэжээлээр хангах ажилд бүх талаар дэмжин, сурагчдын хоол хүнсэнд шаардлагатай хүнсний ногоог тариалах, хадгалахад шаардлагатай хүлэмж болон зоорийг бэлтгэх тал дээр хамтран ажиллахаа илэрхийлэв. Мөн холбогдох төрийн байгууллагуудад үдийн хоол хөтөлбөрийн өнөөгийн нөхцөл байдлыг сайжруулахад төслийн багийнхантай нягт хамтран ажиллах талаар чиглэл өгчээ.
