Дундговь аймгийн Засаг даргын Тамгын газар, Дундговь-Ус ОНӨААТҮГ хамтран Дундговь аймгийн төв болон сум, суурин газрын ундны усны чанарын судалгааг Хот, суурины ус хангамж, ариутгах татуургын ашиглалт, үйлчилгээг зохицуулах зөвлөлөөр гүйцэтгүүлэн, энэ сарын 12-ны өдөр тайланг хүлээн авлаа. Тус судалгаа нь 60 гаруй сая төгрөгийн зардлаар хийгдэж буй бүрэн хэмжээний анхны томоохон судалгаа юм.
Судалгаанд аймгийн хэмжээний 64 ундны усны цэгийг хамруулж, холбогдох дүгнэлтийг гаргасан байна. Ундны усыг стандартад бүрэн нийцүүлэх чиглэлээр холбогдох мэргэжлийн байгууллагаас нэн түрүүнд авч хэрэгжүүлэх шаардлагатай ажлын зөвлөмжийг ирүүлэхээр болж, цаашид ундны усны жил бүрийн төлөвлөгөөнд тусган хэрэгжүүлэх ажлуудын талаар санал солилцжээ.
