“Монгол цэргийн өдөр”, орчин цагийн Зэвсэгт хүчин үүсэн байгуулагдсаны 101 жилийн ойг тохиолдуулан Монгол улсын Ерөнхийлөгч, Зэвсэгт хүчний ерөнхий командлагч У.Хүрэлсүхийн зарлигаар Дундговь аймгийн Дэлгэрцогт сумын уугуул, Зэвсэгт хүчний Жанжин штабын сургалт, бэлтгэлийн газрын дарга, хурандаа Ганболдын Болорт цэргийн дээд цол, Бригадын генерал цол хүртээв.

Ганболдын Болор нь Цэргийн Их сургуульд сонсогчоор элсч, 1999 онд Цахилгаан холбооны инженер, командын офицер мэргэжлээр төгсч, цэргийн сургуулийн анхны зургаан эмэгтэй сонсогчдын нэг, АНУ-ын Нисэх хүчний команд штабын коллежийг төгссөн анхны монгол эмэгтэй офицер юм.

Тэрээр НҮБ-ын энхийг сахиулах ажиллагааны төв штабын офицероор 2 удаа, НҮБ-ийн төв штабын удирдах албан тушаалд Монгол улсаас томилогдсон анхны эмэгтэй бөгөөд 2006 онд Энхийг сахиулах ажиллагаанд анхны эмэгтэй цэргийн ажиглагч офицер илгээснээс хойш 872 эмэгтэй Энхийг сахиулах болон олон улсын ажиллагаанд оролцжээ. Монгол улс НҮБ-д цэрэг хандивлагч 100 гаруй орноос эмэгтэй энхийг сахиулагчдын тоогоороо 17 дугаарт, Зүүн Хойд Азид нэгдүгээрт эрэмбэлэгдэж байна.

Эрхэм хүндэт Бригадын генерал Ганболдын Болор танд Дундговь нутгийн ард түмнийхээ нэрийн өмнөөс болон хувиасаа чин сэтгэлийн талархал илэрхийлье.

Хүндэтгэсэн Дундговь аймгийн Засаг дарга Цагаанхүүгийн Мөнхбат.