Энэ сарын 28-29-ний өдрүүдэд Сүхбаатар аймгийн Баруун-Урт хотноо зохион байгуулагдсан эрдэс баялаг, уул уурхайн салбарын зөвлөлдөх уулзалтад Дундговь аймгаас оролцсон аймгийн Засаг дарга Ц.Мөнхбат, Засаг даргын Тамгын газрын дарга Л.Доржбат, Сайнцагаан сумын Засаг дарга С.Бат-Оргил болон холбогдох албаны хүмүүс туршлага судлах, орон нутгийн хөгжил дэвшилд шинэлэг санал санаачлагыг нэвтрүүлэх зорилгоор тус аймагт хийгдэж буй бүтээн байгуулалт, дэд бүтэц, хот тохижилтын чиглэлээр тус аймгаас баримталж буй бодлого чиглэл, үйл ажиллагааг газар дээр нь үзэж танилцан харилцан мэдээлэл солилцлоо.
Аймгийн төв Баруун-Урт хот нь Улаанбаатар хотоос 560 километр зайтай, 82.3 мянган километр хавтгай дөрвөлжин нутаг дэвсгэртэй тус аймаг дэд бүтцийг нэмэгдүүлэх, иргэдийнхээ амьдрах орчин нөхцөлийг сайжруулахад түлхүү анхааран хот төлөвлөлтөө хийж гэр хороолол дунд 5 тойрог бүхий 50 гаруй километр авто замыг улсын төсвийн хөрөнгөөр барьж байгуулсан байна.
Мөн тус аймагт хийгдсэн 236 айлын хаус хороолол, олон улсын стандартад нийцсэн усан бассейн, хөл бөмбөгийн талбай, дэд бүтэц зэрэг томоохон бүтээн байгуулалттай аймгийн удирдлагууд танилцан орон нутагтаа сайн туршлагыг нэвтрүүлэх талаар туршлага судаллаа.
