ОХУ-аас Монгол улсын нутаг дэвсгэрээр дамжуулан БНХАУ-руу байгалийн хий хоолой татах төслийн талаар гүйцэтгэгч байгууллага болох “Газопровод Союз Восток” ХХК-ийн төлөөлөл өнөөдөр аймгийн Засаг дарга Ц.Мөнхбат, иргэдийн Төлөөлөгчдийн Хурлын нарийн бичгийн дарга Ш.Энхсүх болон Цагаандэлгэр сумын удирдлагууд, холбогдох албаны хүмүүстэй уулзалт хийж, дээрх төслийн талаар танилцууллаа.
Монгол улсын нутаг дэвсгэрээр дамжин өнгөрөх байгалийн хий дамжуулах хоолой нь 957 км үргэлжлэх бөгөөд манай аймгийн Цагаандэлгэр сумын 36,2 км нутаг дэвсгэрээр дайран өнгөрөх юм. Уулзалтаар тус төслийн инженерийн судалгаа гүйцэтгэх зөвшөөрөл олгох, хий дамжуулах хоолойн ойролцоо орших нэгж талбаруудын эзэмшлийн болон зориулалтын талаарх мэдээлэл өгөх, дээрх ажлын зураг төсөл, судалгааны ажил гүйцэтгэх болон барилгын ажил гүйцэтгэхэд хамтран ажиллах хариуцлагатай албан тушаалтныг орон нутгийн төрийн захиргааны байгууллагуудаас тодорхойлох зэрэг асуудлыг хэлэлцэн шийдвэрлэжээ.
