Монгол Улсын Засгийн газрын ээлжит хуралдаанаар Үндэсний их баяр наадмыг долоодугаар сарын 10-12-ны өдөр, тэгш ой, бүсийн хурдан морины уралдааныг  долоодугаар сарын 22-30-ны хооронд тэмдэглэн өнгөрүүлэхээр шийдвэрлэсэн.

Засгийн газрын шийдвэрийн дагуу Дундговь аймаг байгуулагдсаны түүхт 80 жилийн ойн бэлтгэл ажлыг хангах, тэмдэглэн өнгөрүүлэх аймгийн ерөнхий болон салбар комиссыг томилох мөн бүрэлдэхүүнд орох гишүүдийг сонгох хурлыг аймгийн Засаг дарга удирдан зохион байгууллаа.
Түүхт 80 жилийн ойн баяр наадмын ерөнхий комиссын даргаар аймгийн Засаг дарга Ц.Мөнхбат ажиллах бөгөөд хэлтэс, агентлагийн удирдлагуудаар ахлуулсан 12 салбар комисс байгуулж, үйл ажиллагааны чиглэлийн талаар санал солилцсон юм.

Ойн арга хэмжээний бэлтгэл ажлыг хангах, тэмдэглэн өнгөрүүлэх ажлын хүрээнд хандивлагчдыг хамруулсан эвентүүдийг үе шаттайгаар зохион байгуулахаар төлөвлөж байгаа бөгөөд баяр наадмын арга хэмжээний үеэр зочид төлөөлөгчид, хандивлагчдыг хүндэтгэн хүлээн авах, үйлчилгээ эрхлэгчдийн бүтээгдэхүүн үйлчилгээнд эрүүл ахуй, аюулгүй байдлын хяналтыг сайжруулах, айл өрх, албан байгууллага, гудамж талбайн гэрэлтүүлэг тохижилтыг сайжруулах, ногоон байгууламж, цэцгийн мандал хийх, баяр наадмын өдрүүдэд талбайн цэвэрлэгээ, үйлчилгээг тогтмол чанартай хийх зэрэг үүрэг чиглэлийг өгсөн байна.