Соёлын биет бус өвийг сурталчлан таниулах, түгээн дэлгэрүүлэх, үр хойчдоо өвлүүлэн үлдээх зорилго бүхий Монгол Улсын соёлын биет бус өвийн “Нүүдэлчин Монгол – 2022” фестивалийн нээлтийн үйл ажиллагаа өнөөдөр боллоо.
Энэхүү фестивальд 21 аймаг, нийслэлээс ирсэн 1400 гаруй шилдэг өвлөн уламжлагчид өөрсдийн соёлын биет бус өвийг өвлүүлэн сурталчилж байгаа юм.
Дундговь аймгийн нутгийн онцлог, ёс заншил, биет бус өвийг түгээн таниулахаар 61 ардын авьяастан, гар урлал, үндэсний үйлдвэрлэгчид болон нутгийн удирдлагууд орон нутгаа төлөөлөн оролцож язгуур урлагийн тоглолт, гар урлалын үзэсгэлэн, худалдаа, орон нутгийн онцлогийг харуулсан уламжлалт хоол хүнс, идээ ундааны соёлын өвийг уламжлан дэлгэрүүлж байна.
