“Нээлттэй Дундговь” хөрөнгө оруулалтын чуулга уулзалтын үеэр Дундговь аймаг болон MORA JE группийн төлөөллүүд хамтын ажиллагааны тухай санал солилцон, зургаадугаар сарын 22-ны өдөр хүнсний ногооны шинэ сортын үрийг нутагшуулан, импортыг бууруулж, экспортыг нэмэгдүүлэх, ажлын байр шинээр бий болгох, нэмүү өртөг шингэсэн эко бүтээгдэхүүн үйлдвэрлэх зорилгоор хамтын ажиллагааны “Санамж бичиг”-ийг байгуулсан юм.

Санамж бичгийн хүрээнд Дундговь аймгийн Засаг даргын Тамгын газар, МОРА ТББ болон МОРА ЖИ ЭЙ групптэй хамтран “Хүнс хөдөө аж ахуй, хүнсний ногоо, хүлэмжийн бизнесийн ирээдүйн чиг хандлага, ашигт ажиллагааг нэмэгдүүлэх гарц – Япон орны туршлагаас” сэдэвт сургалт, санал солилцох уулзалтыг есдүгээр сарын 29-ний өдөр зохион байгуулж, сумдын хөдөө аж ахуй, газар тариалан, жижиг дунд үйлдвэрлэл хариуцсан мэргэжилтэн, газар тариалан эрхлэгчдийн төлөөлөл оролцлоо.

Түүнчлэн шинэ сорт болох шар тарвас, торлог амтат гуаны туршилтын тариалалтыг өвлийн Нарлаг хүлэмжид хийхээр лабораторийн шинжилгээнд хамрагдаж, чанарын шаардлага хангасан үрийг өгөхөөр болжээ. Мөн хөрс сайжруулах ургамлын тариалалтыг Луус суманд туршихаар болсон байна.