Аймгийн Онцгой комиссын 2023 оны дөрөвдүгээр хурал өнөөдөр 78.1 хувийн ирцтэй хуралдлаа.

Хурлаар аймгийн Засаг дарга Ц.Мөнхбат дулаанаар хангах байгууллагуудын үйл ажиллагааг сайжруулах, нөхцөл байдлыг бодитоор үнэлэх үүднээс 11-р сарын 20-ны дотор Эрчим хүчний зохицуулах зөвлөлөөс ус, дулаанаар хангах байгууллагуудад хяналт, шалгалтыг зохион байгуулж, танилцуулах үүрэг, чиглэл өгөв.

Мөн Аймгийн зудын эрсдэлийн үнэлгээ, зудын гамшигтай тэмцэх төлөвлөгөө боловсруулах ажлын хэсэг шуурхай ажиллаж, төлөвлөгөөг хугацаанд нь танилцуулах, аюул үзэгдэл, ослын үед ашиглах шатахууны нөөцийн 20 сая төгрөгийг аймгийн гамшгийн эрсдэлийг бууруулах зардлаас гаргаж, Онцгой байдлын газар хариуцуулахаар тус тус шийдвэрлэжээ.

Түүнчлэн Онцгой байдлын газраас сумд, аймгийн гамшгаас хамгаалах алба, мэргэжлийн ангийн удирдлагуудад өвөлжилтийн бэлтгэл, бэлэн байдлыг хангуулах талаар албан бичгээр үүрэг хүргүүлэх, Хүнс хөдөө аж ахуйн газар, Мал эмнэлгийн газар, Цаг уур, орчны шинжилгээний төв зэрэг холбогдох мэргэжлийн байгууллагууд өвөлжилтийн нөхцөл байдлын талаарх мэдээллийг сумдад хүргүүлэх, сумдууд өвөлжилтийн бэлтгэл ажлыг хангах хүрээнд Онцгой байдлын газраас зөвлөмж авч, их цас орсон үед зам гаргах төхөөрөмжийг хийж бэлдэх зэрэг үүрэг, чиглэлийг өгсөн байна.