Монгол улсад Дэлхийн эрүүл мэндийн байгууллагаас 2005 онд баталсан Олон улсын эрүүл мэндийн дүрмийн үндсэн чадавхын хөндлөнгийн хамтарсан үнэлгээг 2023 оны 11-р сарын 17-25-ны өдрүүдэд хийж байна.

Тус ажлын хүрээнд Эрүүл мэндийн яамны Урьдчилан сэргийлэлт, хяналт зохицуулалтын хэлтсийн дарга Б.Туяагаар ахлуулсан Номхон далайн баруун бүсийн төвийн эрүүл мэндийн аюулгүй байдлын мэдээлэл, эрсдэлийн үнэлгээний асуудал хариуцсан менежер Др.Тамано Мацуй, мэргэжилтэн Сэлли-Анн Охэнэ, Руфино Франциско, Японы ХӨҮХ-ийн талбарын тархвар зүйн судалгаа, мэргэжлийн хөгжлийн төвийн эпидемийн судалгаа, сургалт дадлагын хэлтсийн дарга Томоэ Шимада, Дэлхийн эрүүл мэндийн байгууллагын суурин төлөөлөгчийн газрын мэргэжилтэн Б.Дуламрагчаа нарын 11 хүний бүрэлдэхүүнтэй үнэлгээний баг манай аймагт 11-р сарын 20-ны өдөр ажиллав.

Үнэлгээний багийг орон нутагт ажиллах үеэр аймгийн Засаг даргын орлогч М.Анхбаяр хүлээн авч уулзан, гамшиг, нийгмийн эрүүл мэндийн ноцтой байдлын үед авсан хариу арга хэмжээний талаар санал солилцож, амжилттай хэрэгжүүлснийг тэмдэглэн хэллээ.

Уулзалтад Нийгмийн бодлогын хэлтсийн дарга Н.Эрдэнэ-очир, Эрүүл мэндийн газрын дарга Б.Алтантөгс, Онцгой байдлын газрын ахлах мэргэжилтэн Л.Дорждэрэм, Зоонозын өвчин судлалын төвийн дарга Н.Мөнгөнцэцэг, Нэгдсэн эмнэлгийн дарга Э.Энхзоригт нар оролцсон юм. Үнэлгээний баг дээрх байгууллагууд дээр очиж, Олон улсын эрүүл мэндийн дүрмийг хэрэгжүүлж байгаа үйл ажиллагаатай нь танилцаж, үнэлгээний уулзалт хэлэлцүүлгийг зохион байгуулжээ.