Аймгийн хэмжээнд өвөлжилт, хаваржилт хүндэрч, нийт сумдаар цасан бүрхүүл тогтон, малын идэш ховордож, цаашид улам хүндрэх төлөвтэй байна. Монгол улсын Засгийн газрын шийдвэрээр хаваржилт хүндэрсэн аймгуудад тусламж үзүүлэх Улсын онцгой комиссын шуурхай бүлгүүд хөдөө орон нутагт ажиллаж байна.
Дундговь аймгийн Адаацаг суманд Монгол улсын Шадар сайд С.Амарсайханаар ахлуулсан болон аймгийн Засаг дарга бөгөөд Онцгой комиссын дарга Ц.Мөнхбатаар ахлуулсан ажлын хэсгүүд энэ сарын 19-нд ажиллав.
Энэ үеэр улсын Онцгой комиссоос 700 тонн өвс, тэжээл үнэ төлбөргүй нийлүүлэх, мөн Адаацаг сумын Эрүүл мэндийн төвд туулах чадвар сайтай, эмнэлгийн бүрэн тоноглогдсон автомашин олгохоор шийдвэрлэлээ.
