Дэлхийн эмч нарын эрхийг хамгаалах өдөрт зориулан уламжлал болгон зохион байгуулдаг Эрдэм шинжилгээ, онол практикийн XI бага хурал “Эмч бүр судлаач байя” уриан дор боллоо.

Тус бага хуралд зочин илтгэлээр Монгол улсын хүний гавьяат эмч Б.Ганхөлөг “Онол практикийн бага хурлын тойм”, Анагаах ухааны доктор, Уламжлалт анагаах ухааны их эмч, АШУҮИС-ийн бие бялдар судлалын тэнхимийн багш Г.Намуун “Судалгааны арга зүй” сэдэвтэй илтгэл танилцуулж, хэлэлцүүлэг илтгэлд есөн бүтээл оролцов.

Бага хуралд оролцсон илтгэлүүдээс 1-р байрт Нэгдсэн эмнэлгийн дотрын эмч Б.Хишигсүрэн, Мэдрэлийн эмч Н.Гүрбадам нарын “Дислипидемитэй хүмүүсийн дундах гавлын гадна судасны эмгэг болон хамаарлыг судалсан нь”, 2-р байрт Нэгдсэн эмнэлгийн дүрс оношилгооны эмч П.Мягмарсүрэнгийн “Ходоод гэдэсний салстын шархлаа өвчнийг үүсгэж буй зонхилох эрсдэлт хүчин зүйлсийг тогтоох нь”, 3-р байрт Нэгдсэн эмнэлгийн халдвар судлаач Б.Бямбасүрэнгийн “Дундговь аймгийн нэгдсэн эмнэлэгт бүртгэгдсэн метициллинд тэсвэржсэн стафилококк ауриусийн халдварыг судалсан дүн” тус тус шалгарсан байна.

Илтгэлийн шүүгчдээр АШУҮИС-ийн эрдэмтэн багш нар урилгаар оролцож, судлаач эмч, эмнэлгийн ажилтнуудад зочин илтгэл танилцуулан, жил бүрийн оролцогчдын бүтээл болон эрдэм шинжилгээний бүтээлийн үзэсгэлэн гаргасан зэрэг нь онцлог аж.