БНХАУ-аас Замын-Үүдэд суугаа Ерөнхий консулын газрын Ерөнхий консул Кэ Юушэн, Дэд ерөнхий консул Жан Иши, Худалдааны консул Улаанбагана, Дэд консул Бао Юйлань болон Элчин сайдын яамны албан тушаалтнууд өнөөдөр Дундговь аймагт албан айлчлал хийж байна.
Айлчлалын үеэр Дундговь аймгийн Засаг даргын орлогч М.Анхбаяр болон орон нутгийн удирдлагууд хүлээн авч уулзан, санал солилцлоо. Уулзалтаар Ерөнхий консул Кэ Юушэн хамтын ажиллагааны хүрээнд бодит үр дүнгүүд гарч буйд талархал илэрхийлэн, цаашид бүтээн байгуулалт, ногоон байгууламж зэрэг олон чиглэлээр хамтын ажиллагаагаа өргөжүүлэн бэхжүүлэхэд хамтран ажиллах хүсэлтэй буйгаа илэрхийлэв. Мөн аймгийн Засаг даргын орлогч М.Анхбаярын зүгээс хөдөө аж ахуйн болон эрүүл мэндийн салбарт боловсон хүчин бэлтгэх, төрийн албан хаагчдын туршлага судлах үйл ажиллагаа амжилттай хэрэгжиж буйд талархал илэрхийлж, цаашдаа урлаг соёл, боловсролын чиглэлээр хамтын ажиллагааг өргөтгөх хүсэлтэй байгаагаа онцолсон юм.
БНХАУ-ын Замын-Үүдэд суугаа Ерөнхий консулын газраас Дундговь аймагт эко орчин бүрдүүлэх, ногоон байгууламжийг нэмэгдүүлэх ажилд тавин мянган юанийн тусламжийг өгсөн байна. Тус ажлын хүрээнд иргэдийн тав тухтай амьдрах орчин нөхцөлийг бүрдүүлэх зорилгоор байгуулсан Равжих төгөлд нөхөн тарилт хийж, усалгааны систем болон шаардлагатай тоног төхөөрөмжийг шийдвэрлэхээр болжээ. Айлчлалын үеэр Ерөнхий консулын газрын болон аймаг орон нутгийн удирдлагууд хамтын ажиллагааны илэрхийлэл болгон дээрх төгөлд мод тарилаа.
