Боловсролын яам, Сургуулийн судалгаа хөгжлийн "Шинэ Монгол" төв ТББ-тай хамтран 2024-2025 оны хичээлийн жилд төрийн өмчийн ерөнхий боловсролын сургуулийн менежментийг сайжруулах төслийг улсын хэмжээнд нийт 250 гаруй сургуулиас сонгон шалгаруулалт хийж, зургаан аймаг, таван дүүргийн 120 сургуульд хэрэгжүүлэхээр болжээ.
Төслийн нээлтийн ажиллагааг өнөөдөр Дундговь аймагт хийж, “Сургуулийн менежментийг сайжруулах хөтөлбөр, арга хэмжээ”-ний сургалтыг зохион байгуулан, 15 сургуулийн нийт 60 удирдах ажилтан, арга зүйчийг хамруулж байна. Нээлтийн ажиллагаанд УИХ-ын гишүүн, Төслийн санаачлагч, Монгол улсын гавьяат багш, доктор Ж.Галбадрах, Дундговь аймгийн Засаг дарга С.Мөнхчулуун нар оролцлоо.
Энэ үеэр аймгийн Засаг дарга С.Мөнхчулуун тус төслийг манай аймагт хэрэгжүүлэх болсонд талархал илэрхийлэн, төсөл хэрэгжсэнээр боловсролын чанар, хүртээмж сайжирч, сурагчдын сурлагын түвшин улсын жишигт хүрэх боломж бүрдэж буйг онцлов.
Төрийн өмчийн ерөнхий боловсролын сургуулийн менежментийг сайжруулах төслөөр багш нарыг багт нэгтгэх менежмент, багшийг ажлын байранд нь хөгжүүлэх менежмент, сургуулийн эерэг соёл төлөвшүүлэх менежмент, зүрх сэтгэлийн боловсролын хөтөлбөр хэрэгжүүлэх менежмент зэрэг практикт суурилсан 32 долоо хоногийн дагуулан сургах хөтөлбөр хэрэгжих юм.
