Багануур-Зүүн өмнөд бүсийн цахилгаан түгээх сүлжээ ТӨХК-иас Дундговь аймгийн цахилгаан, эрчим хүч хэрэглэгчдэд зориулсан “Цахилгаан эрчим хүч хэрэглэгчийн эрхийг хамгаалах” уулзалт, өдөрлөгийг анх удаа зохион байгууллаа.

Тус уулзалт, өдөрлөгөөр цахилгаан, эрчим хүч хэрэглэгч, хангагч хоёрын хоорондох харилцааг сайжруулах зорилгоор хэрэглэгчдийн эрх зөрчигдөж байгаа эсэх, иргэдэд тулгамдаж буй бусад асуудлын талаар нээлттэй ярилцаж, иргэдийн санал гомдлыг хүлээн авчээ. Түүнчлэн иргэдэд цахилгааны төлбөр дээр нэмэлтээр авдаг телевизийн хураамж, цаашид нэмэлтээр авах хогны мөнгөний хураамжийн талаар дэлгэрэнгүй мэдээлэл өгсөн байна.

Дундговь Цахилгаан түгээх сүлжээ салбарын дарга Г.Мягмарсүрэн хэлэхдээ, “Энэ уулзалт, өдөрлөгөөр дамжуулан 130 гаруй хэрэглэгчдэд хүрч ажиллалаа. Өмнө хэрэглэгчдэд зориулсан өдөрлөгөөр зөвхөн салбарын удирдлагууд оролцдог байсан бол энэ удаа аймаг, сум орон нутгийн удирдлага болон цахилгаан, эрчим хүчийг түгээж буй холбогдох компаниудын удирдлагууд оролцож, иргэдийн асуултад хариулан, иргэдэд хэргэцээтэй мэдээ мэдээллийг өгч, буйгаараа онцлогтой” гэв.

Багануур-Зүүн өмнөд бүсийн цахилгаан түгээх сүлжээ ТӨХК-ийн харьяа Дундговь Цахилгаан түгээх сүлжээ салбар нь Дундговь аймгийн 10 сум, Өмнөговь аймгийн нэг сумын нийт 6924 хэрэглэгчийг цахилгаан, эрчим хүчээр ханган ажиллаж байна.