Аймгийн ЗДТГ, Хөдөлмөр, халамж үйлчилгээний газар, Хөгжлийн бэрхшээлтэй иргэдийн холбоо, Хөгжлийн бэрхшээлтэй иргэдийн “Түгээмэл хөгжил” бие даан амьдрах төвөөс хамтран зохион байгуулж буй “Mongolian try” хөдөлгөөнийхөн Дундговь аймагт нөлөөллийн үйл ажиллагаа зохион байгууллаа. “Mongolian try” хөдөлгөөний оролцогчид өнөөдөр Дундговь аймгийн Засаг даргын орлогч Ж.Мөнхчулуунтай уулзалт, хэлэлцүүлгийг өрнүүлсэн юм. Хэлэлцүүлгийн үеэр хөдөлгөөний зорилго, чиглэл, нөлөөллийн үйл ажиллагааг танилцуулсан бөгөөд хөтөлбөрт оролцож буй хөгжлийн бэрхшээлтэй иргэдийн зүгээс Дундговь аймагт хөгжлийн бэрхшээлтэй иргэн үйлчилгээний байгууллагуудаар үйлчлүүлж, гудамж талбайгаар явахад хүртээмжтэй зам талбай бага байгааг дурьдлаа.

Орон нутгийн хэмжээнд хөгжлийн бэрхшээлтэй иргэдийг чадавхжуулах, бие даан амьдрах системийг ойлгуулах, нийгэмшүүлэх, нийгмийн болон асран хамгаалагчдын хандлагыг өөрчлөх зорилгоор тус хөдөлгөөнийг гурав дахь удаагаа зохион байгуулж байгаа бөгөөд энэ хөдөлгөөн нь Төв, Өмнөговь, Дундговь аймгуудийг хамарч, энэ сарын 21-ний өдрийг дуустал үргэлжлэх юм байна.