Засгийн газрын Хэрэг эрхлэх газраас 9 дүгээр сарын 4-ний өдрийн 15 цагт бүх аймгуудтай цахим хурлыг зохион байгууллаа. Цахим хуралд Дундговь аймгийн Засаг дарга О.Бат-Эрдэнэ, Засаг даргын орлогч Ж.Мөнхчулуун болон хэлтэс, агентлагийн дарга нар нийт 16 хүний бүрэлдэхүүнтэй оролцлоо.Тус хурлаар Засгийн газраас сүүлийн үед хэрэгжүүлж буй цаг үеийн ажлын явцын талаар товч мэдээлэл хийж аймаг орон нутгийн төрийн албан хаагчид тогтоол шийдвэрийн биелэлтийг хэрхэн ханган ажиллаж байгаа болон өвөлжилтийн бэлтгэл ажлын явцын мэдээллийг сонссон юм.
Аймгийн Засаг дарга О.Бат-Эрдэнэ 2018 оныг “Хариуцлагын жил” болгон зарласантай холбогдуулан Төрийн албан хаагчдын сахилга хариуцлага, ёс зүй, ажлын цаг ашиглалтыг сайжруулан бүтээмжийг нэмэгдүүлэх талаар Засгийн газрын 32 тоот, 258 дугаар тогтоол, Засгийн газрын 01 тоот албан даалгаврын мөрөөр авч хэрэгжүүлж буй ажлын явц 83 хувьтай, Аймгийн өвөлжилтийн бэлтгэл ажил 73 хувьтай байгаа тухай мэдээлэл хийв.
Дундговь аймагт тулгамдаж буй
- Олгойн говийн цэвэр усны байгууламжийн цахилгааны засвар шинэчлэх ажил
- 2017 онд гарсан шүлхий өвчний үеэр зарцуулсан 200 гаруй сая төгрөгийн зардал
- Аймгийн 75,2 мянган үхрийг вакцинд хамруулах
- Нэгдсэн халаалтад холбогдсон сумдын халаалтын зардлын зөрүүг ирэх оны төсөвт суулгуулах зэрэг асуудлыг яаралтай шийдвэрлэх талаар дэмжин тусалж, хамтран ажиллах саналыг ЗГХЭГ-ын дарга болон яамдын удирдлагуудад тавьлаа.
ЗГХЭГ-аас аймаг орон нутгийн төрийн албан хаагчдад тогтоол шийдвэрийн хэрэгжилтийг ханган ажлын байранд согтууруулах ундаа, хутга мэс, шатах дэлбэрэх бодис зэрэг зүйлсийг хориглон иргэн бүрт эрх тэгш, соёлтой үйлчлэн ажлын хариуцлагаа сайжруулан, ёс зүйтэй ажиллах, аймгууд өвөлжилтийн бэлтгэл ажлаа эрчимжүүлж, тайлагнаж ажиллах талаар чиглэл, заавар зөвлөмж өгсөн байна.
