Засаг даргын А/231 дугаар захирамжаар баталсан “Архидалтгүй аймаг–Дундговь” дэд хөтөлбөрийн хүрээнд ард иргэдээ архидалтгүй эрүүл, аюулгүй орчинд амьдрах нөхцлийг бүрдүүлэх, эрүүл аж төрөх зан үйлийг төлөвшүүлэхэд төрийн болон төрийн бус байгууллага, олон нийт, иргэдийн оролцоог нэмэгдүүлэх зорилгоор “Архидалтгүй аймаг - Дундговь” сурталчилгаа, мэдээллийн өдөрлөгийг сумдад зохион байгуулж байна.
Тус өдөрлөгийг “Монголын эрэгтэйчүүдийн хөгжлийн нийгэмлэг” ТББ-тай хамтран зохион байгуулж буй бөгөөд 10 дугаар сарын 5-аас 11 дүгээр сарын 5-ны хооронд болох аж. Өдөрлөг нь Дэлгэрцогт сумаас эхлэх бөгөөд 10 дугаар сарын 5-нд Дэлгэрцогт, 6-нд Дэрэн, 7-нд Говь-Угтаал, Цагаандэлгэр, 8-нд Өндөршил, Баяржаргалан, 9-нд Гурвансайхан, 10-нд Луус, 11-нд Хулд, 12-нд Дэлгэрхангай, 13-нд Сайхан-Овоо суманд болон 15-наас хойш Өлзийт, Адаацаг, Эрдэнэдалай, Сайнцагаан сумдад тус тус үргэлжилнэ.
Өдөрлөгийн үеэр МУСГЗ, Зохиолч яруу найрагч Ж.Цогтсугар иргэдтэй уулзалт, ярилцлага хийж, лекц, илтгэлүүдийг тавих юм.
