Жил бүрийн 5 дугаар сарын эхний долоо хоногийн бямба гарагийг “Хөрс хамгааллын өдөр” болгосон байдаг. Уг өдрийг тохиолдуулан хөрсний доройтол, нөхөн сэргээлт, хөрс хамгааллын асуудлаар санал солилцох, талбайн үзүүлэх сургууль хэлэлцүүлгийг Дундговь аймгийн Дэрэн сум дахь Эрдэм шинжилгээ туршилт үйлчилгээний орон нутгийн үйлдвэрийн газрыг түшиглэн зохион байгууллаа.
Монгол орны хөрсний эвдрэл доройтол, хөрс хамгааллын асуудал, Хөрс хамгаалах асуудлууд, Монгол орны тариалангийн хөрс хамгаалах, ашиглах технологи зэрэг сэдвээр хэлэлцүүлэг зохион байгуулж Дэрэн сум дахь Эрдэм шинжилгээ туршилт үйлчилгээний орон нутгийн үйлдвэрийн газарт талбайн үзүүлэх сургууль, хөрсний дээжлэлт, шинжилгээ хийсэн байна.
Байгаль орчин аялал жуулчлалын яамнаас зохион байгуулж буй тус хэлэлцүүлэгт аймгийн Засаг даргын Тамгын газар, Хүнс хөдөө аж ахуйн газар, Байгаль орчин аялал жуулчлалын газар, Ус цаг уур орчин шинжилгээний төв, Дэрэн сумын Засаг даргын Тамгын газар хамтран оролцлоо. Мөн Байгаль орчин аялал жуулчлал яамны Газар зохион байгуулалт усны нэгдсэн бодлого зохицуулалтын газар, ХХАИС-ын хөрс судлаач доктор, Газарзүй- Геоэкологийн хүрээлэн, болон академич, профессор, оюутан залуусын төлөөлөл зэрэг 70 гаруй хүн оролцлоо.
