Нэгдсэн Үндэсний Байгууллагын Хүн амын сан, Люксенбургийн Их вант улсын санхүүжилттэй “Эх, нярайн зайн оношлогооны төсөл”-ийн төгсгөлийн үе шатны үйл ажиллагааны хүрээнд энэ сарын 4, 5-ны өдрүүдэд аймгийн Нэгдсэн эмнэлгийн эх барих яаралтай тусламжийн эх барих, эмэгтэйчүүд, нярайн эмч, эх баригчдад өртөөчилсөн сургалтыг хийж, эх барихын яаралтай тусламжийн тасагт шууд холболтын тоног төхөөрөмжийг гардууллаа.

Тус тоног төхөөрөмж нь өвчтөний биеийн байдлыг камераар шууд дамжуулан, ЭХЭМҮТ-ийн 24 цагийн зөвлөгөө өгөх нэгжээс зайн оношлогооны зөвлөгөө авах , сургалт хийх боломжийг бүрдүүлж буй аж. Ингэснээр өвчтөний биеийн байдлыг яаралтай үнэлэх, цаг алдалгүй түргэн шуурхай эмчлэх боломжтой юм. Нийт 56 сая төгрөгийн өртөг бүхий уг тоног төхөөрөмжийг суурилуулан өнөөдөр аймгийн Эрүүл мэндийн газар, Нэгдсэн эмнэлгийн удирдлага, тасгийн эмч нарт хүлээлгэн өгсөн юм.

Мөн эх барихын яаралтай тусламжийн 11 төрлийн өртөөчилсөн сургалтыг эх барих, эмэгтэйчүүд, нярайн эмч, эх баригч нарт зохион байгуулж, хэрэглэгдэх тоног төхөөрөмжийг практикт хэрхэн ашиглах талаарх зааврын хамт өглөө. Сургалтыг ЭХЭМҮТ-ийн эх барих, эмэгтэйчүүдийн эмч, сургагч багш Ж.Отгонбаатар, эх нярайн зайн оношлогооны төслийн мэргэжилтэн Б.Шинэтөгс, ЭХЭМҮТ-ийн мэдээллийн төвийн ажилтан н.Чулуун-Эрдэнэ нарын баг хамт олон удирдан явуулсан байна.