Боловсрол, соёл, шинжлэх ухаан, спортын яам болон бусад холбогдох газар хамтран энэ сарын 6-ны өдөр 21 аймгийн төлөөлөлтэй цахим хурлыг зохион байгууллаа. Хурлаар боловсрол, соёл, шинжлэх ухаан, спортын салбарын хөрөнгө оруулалт, эрх шилжүүлсэн худалдан авах ажиллагааны явц, элсэлтийн ерөнхий шалгалт болон бусад тулгамдаж буй асуудлын талаар аймгуудын төлөөллүүдтэй санал солилцон, чиглэл өгсөн байна.
Цахим хурлыг Боловсрол, соёл, шинжлэх ухаан, спортын сайд Ё.Баатарбилэг нээн үг хэлж, Төрийн нарийн бичгийн дарга Б.Баярсайхан, Боловсролын үнэлгээний төвийн дарга Ж.Ган-Эрдэнэ, Санхүү, хөрөнгө оруулалтын газрын дарга С.Нансалмаа болон Төрийн өмчийн бодлого зохицуулалтын газар, Барилгын хөгжлийн төвийн мэргэжилтнүүд тус тус оролцсон юм.
