Дундговь аймгийн Засаг даргын 2016-2020 оны үйл ажиллагааны хөтөлбөрийн 3.1.6- д тусгагдсаны дагуу эмнэлгийн анхан шатны тусламж үйлчилгээг цаг алдалгүй хүргэх боломж бүхий мобайл технологийг Эрдэнэдалай, Дэлгэрцогт сумдад гардуулж өглөө.
Тус анхан шатны багцыг Монгол Улсын 26 дахь Ерөнхий сайд Сү.Батболдын хүү, Монголын Үндэсний олимпын хорооны тэргүүн дэд ерөнхийлөгч Б.Баттүшиг нийгмийн хариуцлагын хүрээнд өгч буй юм. Тэрээр эмээгийнхээ төрсөн нутаг болох Дэлгэрцогт сум, болон хамгийн олон хүн амтай учир Эрдэнэдалай сумдыг тус тус сонгожээ.
Энэхүү анхан шатны тусламжийн багцад ЭХО-ны бичил аппарат, зүрхний цахилгаан бичлэг, сахар, даралтын аппарат зэрэг багтах бөгөөд анхан шатны тусламж үзүүлэх, оношлох боломжийг бүрдүүлж байна.
Цаашдаа боловсрол, спорт, эрүүл мэндийн хүрээнд бодлогоор, илүү өргөн цар хүрээтэйгээр хамтран ажиллах хүсэлтэй байгаагаа Монголын Үндэсний олимпын хорооны тэргүүн дэд ерөнхийлөгч Б.Баттүшиг онцлов.
