Монгол улсын Ерөнхий сайд Оюун-Эрдэнэ Дундговь аймагт хийсэн айлчлалынхаа үеэр Улаанбаатар-Мандалговь чиглэлийн улсын чанартай авто замыг засварлахад шаардлагатай 400 сая төгрөгийг шийдвэрлэн, аравдугаар сарын 10-ны дотор засварын ажлыг хийж гүйцэтгэх үүрэг өгсөн.
Тус ажлын хүрээнд энэ сарын 10-ны өдөр Зам тээврийн хөгжлийн дэд сайд Л.Халтар Дундговь аймагт ажиллан, аймгийн Засаг дарга Ц. Мөнхбатын хамт зам засварын нөхцөл байдалтай танилцлаа. Тэрээр энэ үеэр авто замын засварыг гүйцэтгэж буй Дундговь авто зам ХХК-ийн удирдлагуудад авто замын зарим үлдсэн хэсгийн нөхөөсийг хүйтэн аспальтаар нөхөх, замын хөвөөг илүү дагтаршуулж тэглэх мөн Мандалговь-Луус чиглэлийн авто замын засвар хийсэн зам болон хуучин зам нийлэх хэсгийн овон товонг жигдрүүлэх зэрэг үүрэг, чиглэл өгчээ.
