Өнөөдөр 2023 оны хоёрдугаар ээлжийн цэрэг татлагаар цэргийн албанд тэнцэн, Улаанбаатар цэргийн хүрээний ангиудад хуваарилагдсан цэргүүдийг албанд нь үдэн мордуулав.
Тус үйл ажиллагаанд аймгийн Цэрэг татлагын товчооны дарга, Засаг даргын Тамгын газрын дарга Л.Доржбат, Цэрэг татлагын товчооны даргын орлогч, Цэргийн штабын дарга, дэд хурандаа Ө.Баясгалан, аймгийн Засаг даргын Тамгын газрын хэлтсийн дарга нар оролцож, цэргийн албанд тэнцэн, эх орноо хамгаалахаар явж буй залуустаа амжилт хүссэн юм. Мөн энэ үеэр цэргийн жинхэнэ албанд татагдагч болон тэдний ар гэрийн төлөөлөл сэтгэгдлээ хуваалсан юм.
Ийнхүү 2023 оны хоёрдугаар ээлжээр цэрэгт татагдаж буй залуус ар гэр, ах дүүс, найз нөхөд, ард түмнийхээ халуун итгэл хайраар үдүүлэн энх цагийн манаанд эх орондоо үүрэг гүйцэтгэхээр мордлоо.