Монголын Математикийн холбоо, Дундговь аймгийн Засаг даргын Тамгын газар, Сайнцагаан сумын Засаг даргын Тамгын газар, Боловсрол, шинжлэх ухааны газар, Математикийн гүнзгийрүүлсэн сургалттай “Цэгц билиг” сургууль хамтран Монгол улсын гавьяат багш Н.Өлзийн нэрэмжит XХI олимпиадыг энэ сарын 21, 22-ны өдөр зохион байгуулж, өнөөдөр шилдгүүдээ тодрууллаа.
Олимпиадад Улаанбаатар хот, Дундговь, Өмнөговь, Өвөрхангай, Говьсүмбэр аймгийн 19 сургуулийн 5-12-р ангийн 395 сурагч, 28 математикийн багш оролцож, мэдлэг оюунаа сорин өрсөлдсөн бөгөөд багийн дүнгээр Тэргүүн байранд Улаанбаатар хотын 1-р сургуулийн нэгдүгээр баг шалгарч, цомын эзэд болсон бол Дэд байранд Дундговь аймгийн “Цэгц билиг” сургууль, Гутгаар байранд Улаанбаатар хотын 1-р сургуулийн хоёрдугаар баг тус тус шалгарчээ.
Мөн Монгол улсын гавьяат багш Н.Өлзийн нэрэмжит “Өлзий багш сан”-аас багш, сурагчдын дунд тэтгэлэг зарласан бөгөөд математикийн гүнзгийрүүлсэн сургалттай "Цэгц билиг" сургуулийн математикийн багш Б.Ууганцэцэг "Өлзийт багш"-аар, "Цэгц билиг" сургуулийн 2023 оны "Шилдэг төгсөгч", Дундговь аймгийн 2022 оны "Шилдэг хүүхэд" шагналт 12б ангийн төгсөгч Г.Галсан "Өлзийт сурагч"-аар шалгарч, сангийн нэрэмжит тэмдэг, өргөмжлөл, 1,000,000 төгрөгийн тэтгэлгийг гардан авсан байна.
