Дундговь аймгийн Эрчим хүчний зохицуулах зөвлөлөөс дулааны тусгай зөвшөөрөлтэй Луус, Хулд, Дэлгэрхангай, Эрдэнэдалай, Адаацаг, Дэрэн сумдын зургаан аж ахуй нэгж, байгууллагын 2023-2024 оны өвөлжилтийн бэлтгэл байдал, тусгай зөвшөөрлийн нөхцөл, шаардлагын биелэлтэд хяналт хийлээ. Өвөлжилтийн бэлэн байдалд нүүрсний 5-10 хоногийн нөөцтэй байгаа бөгөөд Өмнөговь аймгийн Тавантолгойн нүүрс, Багануур, Өвөрхангай аймгийн Баян тээгийн уурхайн нүүрсийг хэрэглэж байна. Халаалтын үйл ажиллагаа аравдугаар сарын 25-ны байдлаар хэвийн явж байна.

Хяналт, шалгалтаар нөөц зуухгүй, аваарын дизелийг цахилгааны эх үүсвэрт холбоогүй, зуухны барилга байгууламжийн гадна хашаагүй, өвөлжилтийн бэлтгэл ажлын урсгал засвар дутуу хийсэн байгууллагуудад дутагдлыг арилгуулахаар улсын байцаагчийн хугацаатай албан шаардлага болон албан тоотыг хүргүүлсэн байна.