Монгол улсын Засгийн газар, улсын Онцгой комиссын шийдвэрээр Дундговь аймгийн 7000 малчин өрхөд нийт 70 тонн гурил, 35 тонн цагаан будааг хуваарилсан. Тус гурил, будааг татан авах тээврийн зардлыг аймаг, сумдын Онцгой комиссоос шийдвэрлэж, сумдад тараах хуваарийг аймгийн батлан, малчин өрх тус бүрд 10 кг гурил, 5 кг цагаан будааг олгохоор болжээ.
Тусламжийн гурил, будааг дөрвөн ЗИЛ-131 машинаар Гурвансайхан, Өндөршил, Баянжаргалан, Говь-Угтаал сумдад хүргүүлсэн байна. Бусад сумд мөн татан авалтаа хийж дууссан бөгөөд иргэдэд олгох бэлтгэлээ хийж байгаа юм.
