Монголын Хуульчдын холбооны Ерөнхийлөгчийн тушаалаар жил бүрийн тавдугаар сарын 1-ний өдрийг Хуульчийн нийтэд тустай мэргэжлийн үйл ажиллагаа үзүүлэх өдөр буюу “Хуульчийн Про боно өдөр” болгон зарлаж, Монгол орон даяар 6 дахь жилдээ тэмдэглэн өнгөрүүлж байна.

Монголын Хуульчдын Холбоо нь хуульчийн мэргэжлийн үйл ажиллагаа эрхэлж буй шүүгч, прокурор, өмгөөлөгч, нотариатч, хуульчдыг эгнээдээ нэгтгэсэн, заавал гишүүнчлэлтэй, өөрийн удирдлагатай, хараат бус, нийтийн эрх зүйн хуулийн этгээд юм.

Хуульчид нийтэд тустай мэргэжлийн үйл ажиллагаа болон төлбөрийн чадваргүй иргэдэд өмгөөллийн үйл ажиллагаа үзүүлэх чиг үүргийн хүрээнд Дундговь аймагт “Хуульчийн Про боно өдөр-2024” өдөрлөгийн хүрээнд Засаг даргын Тамгын газрын “Говь” танхимд өнөөдөр 10-15 цагийн хооронд зохион байгууллаа.

Өдөрлөгт Хуульчдын холбооны гишүүн хуульч, шүүгч, прокурор, нотариатч, өмгөөлөгч болон Дундговь аймгийн Шүүх, Прокурорын газар, Цагдаагийн газар, Өмгөөлөгчдийн зөвлөл, Шүүхийн шийдвэр гүйцэтгэх газар, Шүүхийн шинжилгээний хэлтэс, Нотариатчдын танхим, Хүний эрхийн үндэсний комисс, Хууль зүйн Туслалцааны төв, Улсын бүртгэлийн хэлтэс, Нийгмийн даатгалын газар, Татварын газар, Хөгжлийн бэрхшээлтэй иргэний хөгжлийн төв, Архивын тасаг зэрэг нийт 16 байгууллага оролцож, иргэдэд хууль зүйн үнэ төлбөргүй зөвлөгөө өгөх, төрийн байгууллагуудын үйл ажиллагаатай холбоотой мэдээлэл, зөвлөгөө, үйлчилгээ үзүүлж, иргэдийн гомдол мэдээллийг хүлээн авав. Өдөрлөгийн үеэр нийт 210 гаруй иргэн үйлчлүүлж, зөвлөгөө, мэдээлэл авсан байна.